Abuzimi me substanca narkotike nga të rinjtë mbetet një shqetësim i madh në shoqërinë kosovare. Varësia nga droga sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues e shpërndarës të substancave narkotike.
Kështu, Sinjali mëson se një i ri ka rënë në prangat e policisë mbrëmjen e 26 gushtit në Podujevë, pasi u kap me drogë dhe armë të ftohtë.
Sinjali mëson se rreth orës 22:20, një veturë e tipit Opel Insignia, ngjyrë kafe, u ndalua nga njësitë policore në rrugën “Nuhi Gashi”. Gjatë kontrollit, tek shoferi Ensar Musliu, rreth 21-vjeçar u gjet një thikë si dhe një sasi narkotiku që dyshohet të jetë marihuanë (0.90 gram) e fshehur në automjet.
Sendet e dyshimta janë sekuestruar, ndërsa Musliu është shoqëruar në stacionin policor. Me urdhër të Prokurorisë, ndaj tij janë iniciuar rastet për veprat penale: “Mbajtje në pronësi, kontroll ose posedim të paautorizuar të armëve” dhe “Posedim i paautorizuar i narkotikëve, substancave psikotrope ose analoge”.
Hetimet mbi rastin janë duke vazhduar.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.