Një grup gazetarësh të RTK-së ka reaguar publikisht pas një vendimi të marrë nga menaxhmenti, me të cilin ata janë përjashtuar nga moderimi i emisioneve të lajmeve dhe magazinave informative.
Në reagimin e tyre thuhet se vendimi ka qenë i paparalajmëruar dhe i kontestueshëm ligjërisht, duke e cilësuar si ndërhyrje në skemën programore të Transmetuesit Publik.
Gazetarët pretendojnë se ndërhyrja lidhet me pakënaqësitë e shprehura nga përfaqësues të partisë në pushtet pas disa intervistave, ndërsa theksojnë se ndryshime të tilla në program mund të bëhen vetëm nga Bordi i RTK-së, i cili aktualisht nuk është funksional.
Ata e konsiderojnë këtë një situatë që e vështirëson punën e tyre profesionale dhe paralajmërojnë ndjekjen e rrugëve ligjore për mbrojtjen e të drejtave të tyre.