Në Podujevë, aksidentet rrugore po bëhen gjithnjë e më të shpeshta, veçanërisht në zonat urbane dhe ato me qarkullim të madh. Rastet e fundit të përplasjeve në hyrje dhe dalje të qytetit, por edhe në rrugët kryesore brenda tij, po rikthejnë vëmendjen te nevoja urgjente për vetëdijesim dhe respektim të rregullave të komunikacionit. Shumë nga këto aksidente po ndodhin në kushte të zakonshme, pa faktorë natyrorë ose teknike që do të arsyetonin përplasjet, duke lënë të kuptohet se arsyeja kryesore është pakujdesia e shoferëve dhe mungesa e disiplinës në ngasje.
Shpejtësia në zona të banuara, kalimi i vijave të bardha pa ndalje, përdorimi i telefonit gjatë ngasjes dhe parakalimet e rrezikshme janë shndërruar në sjellje të zakonshme, të cilat po rrezikojnë jo vetëm jetën e shoferëve, por edhe të këmbësorëve dhe pjesëmarrësve të tjerë në trafik. Në disa kryqëzime të qytetit tashmë janë regjistruar përplasje të njëpasnjëshme, shpesh me pasoja materiale, por rreziku për pasoja më të rënda është gjithmonë i pranishëm.
Podujeva është një qytet që është duke u zgjeruar, me rritje të numrit të automjeteve dhe ngarkesës në rrugë. Në këtë realitet të ri, nuk mjafton vetëm përmirësimi i infrastrukturës rrugore – edhe pse i domosdoshëm – por është urgjente që të rritet përgjegjësia individuale në timon. Zhvillimi i qytetit duhet të ecë krahas një kulture moderne të vozitjes, ku ndalohet sjellja arrogante në trafik, dhe ku respekti për rregullat nuk shihet si formalitet, por si domosdoshmëri për siguri publike.
Përderisa shumë qytetarë shprehen të shqetësuar për sigurinë në rrugë, janë vetë vozitësit ata që çdo ditë vendosin nëse do të jenë pjesë e problemit apo pjesë e zgjidhjes. Në një vend ku numri i automjeteve po rritet dhe trafiku po bëhet më kompleks, çdo pakujdesi në timon mund të kthehet në tragjedi.
Ngasja me kujdes nuk është vetëm çështje ligjore, por çështje ndërgjegjeje. Më mirë të vonohesh disa minuta, sesa të rrezikosh një jetë. Nëse çdo shofer nis t’i respektojë rregullat pa pritur ndëshkim, atëherë edhe siguria në rrugët tona do të përmirësohet. Deri atëherë, çdo ditë e qetë në trafik do të varet nga fati – dhe fati nuk duhet të jetë planifikim./podujevanews