Imami i njohur Dr. Shefqet Krasniqi ka reaguar me një mesazh të ndjerë pas ndarjes nga jeta të akademikut dhe ish-kryetarit të Kuvendit të Kosovës, Nexhat Daci, duke e cilësuar atë si një humbje të madhe jo vetëm për familjen, por për gjithë shoqërinë kosovare.
Në reagimin e tij, Dr. Krasniqi thekson miqësinë e veçantë që kishte me Nexhat Dacin, duke treguar se e kishte vizituar disa herë në shtëpinë e tij, ku kishin zhvilluar biseda të frytshme për Islamin dhe rolin e namazit. Ai shton se Daci ishte një dashamir i deklaruar i fesë Islame dhe se këtë e shprehte hapur.
Një moment i veçantë i përmendur në reagim është viti 2008, kur Nexhat Daci, si kryetar i LDD-së, priti familjen Krasniqi pas arritjes së madhe të djalit të imamit, Jasirit, i cili u bë hafiz i Kur’anit, duke e vlerësuar thellë këtë sukses dhe duke i dhuruar edhe një dhuratë.
Dr. Krasniqi po ashtu kujton me mirënjohje mbështetjen publike të Nexhat Dacit në vitin 2014, kur ai doli hapur në mbrojtje të hoxhallarëve gjatë arrestimeve të tyre, duke deklaruar bindjen e tij në pafajësinë dhe vlerat që ata përfaqësonin.
Në fund të mesazhit, imami e vlerëson Nexhat Dacin si një prej intelektualëve që dha kontribut të çmuar në ndërtimin e shtetit dhe institucioneve të Republikës së Kosovës, ndërsa i drejton lutje Allahut që ta mëshirojë dhe ta bashkojë me besimtarët e ndjerë.
Familjes Daci, Dr. Shefqet Krasniqi i shpreh ngushëllimet më të sinqerta dhe lutet që Zoti t’u japë durim dhe forcë në këto momente të rënda.