Ish-presidentja e Kosovës, Atifete Jahjaga, ka marrë pjesë në Samitin Global të organizuar nga The Jefferson Educational Society në Erie, Pensilvani, ku ka folur për adresimin e pasojave të luftës gjatë mandatit të saj presidencial.
Në margjinat e samitit, Jahjaga ka zhvilluar një takim me ish-presidentin amerikan, Barack Obama, të cilin e ka falënderuar për mbështetjen e jashtëzakonshme që SHBA-të i kanë dhënë Kosovës. Ajo ka kërkuar nga Obama angazhim të mëtejshëm në forcimin e marrëdhënieve mes dy vendeve, të cilat janë sfiduar pas pezullimit të dialogut strategjik së fundmi.
Jahjaga theksoi se Kosova ka nevojë për ndihmën dhe përkrahjen e vazhdueshme të Shteteve të Bashkuara për konsolidimin e shtetësisë në arenën ndërkombëtare.
“Kosova nuk ka pasur dhe nuk do të ketë kurrë aleat më të madh se Shtetet e Bashkuara të Amerikës dhe populli amerikan. Falë këtij partneriteti, ne sot gëzojmë lirinë, pavarësinë, njohjen ndërkombëtare dhe anëtarësimin në shumë organizata botërore. Për këtë mbetemi përjetësisht falënderues”, ka deklaruar Jahjaga.