Kandidati i Nismës Socialdemokrate për Podujevë, Xhemajl Hasani, ka vizituar sot familjen e Agim Bekës në fshatin Bellopojë, ku ka parë nga afër gjendjen e rëndë në të cilën jetojnë banorët.
Sipas tij, oborri i familjes ishte i mbuluar nga ujërat e zeza për shkak të mungesës së kanalizimit, duke krijuar pamje të ngjashme me një kënetë. Përveç kësaj, familja përballet edhe me mungesën e ujit të pijshëm, një e drejtë elementare që duhet të jetë e garantuar për çdo qytetar.
Hasani kritikoi qeverisjen lokale, duke thënë se ndërkohë që flitet për projekte milionëshe dhe zhvillime “strategjike”, realiteti në terren është krejt tjetër.
“Është koha që komuna të kthejë sytë nga problemet reale të njerëzve dhe të ndalojë propagandën boshe. Jetesa me ujë të ndotur dhe pa kanalizim nuk është çështje luksi, por alarm për veprim të menjëhershëm”, deklaroi Hasani.