Deputeti i Lidhjes Demokratike të Kosovës, Alban Zogaj deklaroi se janë në përgatitje të lëndës që t’i drejtohen Gjykatës Kushtetuese. Sipas tij, në seancat e fundit po vazhdon shkelja e Kushtetutës së vendit.
Kështu u shpreh ai pas ndërprerjes së seancës dhe dështimit të 41-të për konstituim të legjislaturës së nëntë.
“Edhe sot një seancë e re, një episod i ri dhe një shkelje e re e Kushtetutës dhe e rendit kushtetues në vendin tonë. Jemi tejet të shqetësuar dhe të brengosur me atë çfarë po ndodhë në Kuvendin e Kosovës. Në seancat e fundit Kushtetuta e vendit është duke e shkelur me vetëdije, është duke u shkelur çdo ditë dhe kësisoj ne po hyjmë me një krizë edhe më të thellë kushtetuese. Kërkojmë nga partia më e madhe, partia fituese e këtyre zgjedhjeve me u kthy në rendin e ditës, të respektojë Kushtetutën dhe të vazhdojë tutje me konstituim të kuvendit. Çdo dalje nga rendi i ditës është shkelje e re e Kushtetutës dhe normalisht që ne do të reagojmë ndaj këtyre shkeljeve të fundit që po ndodhin”, deklaroi ai, raporton kp.
Ai paralajmëroi që do e dërgojnë në Kushtetuese lëndën, që sipas tij kërkon interpretim nga gjykata lidhur me seancat e fundit.
“Jemi në përgatitje të lëndës për të ju drejtuar Gjykatës Kushtetuese, por normalisht që jemi në koordinim dhe në bashkëpunim edhe në bashkëbisedime që të shohim se si do t’i qasemi por gjithsesi që do t’i qasemi Gjykatës Kushtetuese me pyetjen dhe me adresimin që edhe aktgjykimi i fundit por edhe Kushtetuta e vendit janë duke u shkelur në seancat e fundit që po i shohim”, shtoi ai.
Pas ndërprerjes së seancës nga kryesuesi Avni Dehari, partitë tjera politike kanë vazhduar të qëndrojnë në sallë plenare edhe për disa minuta.
Vazhdimi i seancës është paraparë për datën 5 korrik, nga ora 11:00.